കുറച്ചു വര്ഷങ്ങള്ക്കു മുമ്പ് നടന്ന സംഭവമാണ്. ഞാന് പുതുവര്ഷപുലരിയില് നേരത്തെ എഴുന്നേറ്റ് കുളിച്ച് വിളക്ക് കത്തിക്കുന്നതു കണ്ട് എന്റെ മരുമകള് ചോദിച്ചു, “ അമ്മേ എന്താ പതിവില്ലാതെ രാവിലെ ഭക്തിമാര്ഗ്ഗം?”
“ഞാന് ഒരു സത്യപ്രതിജ്ഞ ചെയ്യാന് പോവ്വാ.”
“അതെന്താ? അമ്മ മന്ത്രിയായോ?”
“ഞാന് സീരിയലുകള് കാണുന്നത് നിര്ത്താന് തീരുമാനിച്ചു.”
സീരിയലുകള് എനിക്കു വല്ലാത്തൊരു പ്രലോഭനമാണ്. അതുമൂലം വീട്ടുകാര്യമൊന്നും ശ്രദ്ധിക്കുന്നില്ല, എപ്പൊഴും ടെലിവിഷനു മുന്നില് കുത്തിയിരിപ്പാണ് എന്നൊക്കെയുള്ള കുറ്റപ്പെടുത്തലുകള് എല്ലാവരില് നിന്നും കേള്ക്കുന്ന കാലം. പ്രലോഭനങ്ങളില് നിന്ന് അകന്നു നില്ക്കാന് എല്ലാവരെയും ഉപദേശിക്കുന്ന ഞാന് ടി വി പരമ്പരയ്ക്ക് തോറ്റുകൊടുക്കുകയോ? അങ്ങനെയാണ് ആ കൊടുംതീരുമാനം എടുത്തത്. അവളുടെ പ്രതികരണം ഒരു പൊട്ടിച്ചിരിയായിരുന്നു. “വേണ്ട, അമ്മയ്ക്ക്
അതെന്തായാലും കഴിയില്ല.”
“ഇല്ല ഇതു ഞാന് തീരുമാനിച്ചതാ” ഞാന് പറഞ്ഞു.
പിന്നീട് കത്തിച്ച നിലവിളക്കിനു നേരെ കൈ നീട്ടി പ്രതിജ്ഞയും എടുത്തു. “ഇന്ന് മുതല് ഞാന് സീരിയലുകള് കാണുന്നതല്ല. ഇതു സത്യം! സത്യം!! സത്യം !!!”
ഉച്ചയ്ക്ക് മൂന്നു മണിക്കാണ് ടെലിവിഷനില് ആദ്യ സീരിയല് തുടങ്ങുന്നത്. ആ സമയം അടുത്തതോടെ ഒരു വല്ലാത്ത അവസ്ഥ. ഇടയ്ക്ക് മരുമകള് ഓര്മിപ്പിക്കുകയുംചെയ്തു. “അമ്മേ സീരിയല് തുടങ്ങാറായി. സത്യം ചെയ്തത് ഓര്മവേണേ…?”
“എന്തിനാണ് ഞാന് വാശി പിടിച്ച് ഈ പരമ്പരകള് കാണുന്നത്. എന്ത് പ്രയോജനമാണ് അതുകൊണ്ട് ഉണ്ടാവാന് പോകുന്നത്?’ ഞാന് സ്വയം ചോദിച്ചു.
സമയം രണ്ടെമുക്കാലായി. ഞാന് അന്നത്തെ പത്രവുമായി ടെലിവിഷന്റെ മുന്നിലിരുന്നു. ഇല്ല എന്ത് സംഭവിച്ചാലും ഞാന് എന്റെ ഭീഷ്മപ്രതിജ്ഞ ലംഘിക്കില്ല. അതൊരു നാണക്കേടായിരിക്കും. ഒന്നാമത്തെ പേജിലൂടെ കണ്ണോടിച്ച് പത്രം തിരിച്ചുപിടിച്ച് അവസാനത്തെ പേജ് വായിക്കാന് തുടങ്ങി. സമയം രണ്ടേ അമ്പത്തിയഞ്ച്. പെട്ടെന്ന് ഒരു ഉള്വിളിയോടെ ഞാന് എഴുന്നേറ്റ് സാരി ശരിയാക്കി ചെരിപ്പുപോലും ഇടാതെ പടി ഇറങ്ങി ഓടി. റോഡിലേക്ക് കയറിയതും ഒരു സ്കൂട്ടര് എന്നെ തട്ടി താഴെയിട്ടു. ഒരു വിധം എഴുന്നേറ്റ് സ്കൂട്ടര്ക്കാരനോട് ഒരു സോറി പറഞ്ഞ് ഞാന് അടുത്ത വീട്ടിലെ പ്രഭാകരന്റെ സ്വീകരണമുറിയിലെത്തി.
“അപ്രത്തമ്മയ്ക്ക് (അപ്പുറത്തെ അമ്മ) എന്ത് പറ്റി.?” പ്രഭ ചോദിച്ചു.
“മോനേ ടിവി ഓണാക്കി ആ സീരിയല് വയ്ക്ക്. ഞാന് അതൊന്നു കാണട്ടെ.” പ്രഭ ടിവി ഓണാക്കി. ഞാന് സീരിയല് കണ്ടു. ഒരു ചമ്മലോടെ വീട്ടില് വന്ന് സ്കൂട്ടര് മുട്ടിയ കാല് തടവിക്കൊണ്ടിരുന്നു. എന്നോട് മരുമകള് പറഞ്ഞു. “ഇത് സത്യം! സത്യം!! സത്യം!!! നാളെ മുതല് അമ്മ ഇവിടെത്തന്നെയിരുന്നു സീരിയല് കണ്ടാല് മതി. ഞാന് കണ്ടു സ്കൂട്ടര് മുട്ടുന്നതും വീഴുന്നതും എല്ലാം….”